Santiago, 28 de outubro de 2010.- Os orzamentos da Consellería do Medio Rural para o 2011 concentran os seus esforzos, mediante unha racionalización exhaustiva do gasto, en investimentos produtivos e subvencións. Trátase, segundo explicou o titular deste Departamento, Samuel Juárez, esta tarde no Parlamento, de empregar os cartos públicos con criterios claros de prioridade. Así, explicou conselleiro, redúcense en maior medida os gastos de funcionamento e investimentos non produtivos.
Cómpre aquí salientar que, do orzamento que esta Consellería dispón cada ano, boa parte do mesmo deriva de fondos provenientes do Goberno Central e a Unión Europea, mediante programas cofinanciados. Pois ben, a redución da achega das outras dúas administracións é moito maior cá galega; de fondos propios, a Xunta reduce a aportación a Medio Rural só no 14’9 %, fronte a unha minoración global do orzamento do 20’6 %.
Puntos fortes
O orzamento de Medio Rural para 2011 contempla unha rebaixa apenas significativa nas partidas destinadas a sanidade animal e incendios, garantindo, en todo caso, a calidade e eficacia destes dous servizos fundamentais. Asemade, e segundo salientou Samuel Juárez, con estas contas garántese a continuidade do programa FEADER (Fondo Europeo Agrícola de Desenvolvemento Rural) 2007-2013, para evitar a perda de fondos europeos, aspecto fundamental nestes tempos de crise.
Ao tempo, dixo tamén o conselleiro que se manteñen as accións máis importantes en materia de conservación da Natureza e espazos protexidos, con investimentos no mantemento eficaz dos hábitats e menos cartos en “ladrillos” (centros de interpretación).
En relación co lácteo -unha das apostas estratéxicas da Xunta para a presente lexislatura- asegúrase que se segue executando o Plan Estratéxico deste Sector, especialmente no que atinxe á modernización das explotacións agrogandeiras e o pulo á logomarca do leite galego de calidade.
En materia forestal, o conselleiro do Medio Rural engadiu que os orzamentos permiten igualmente continuar coas accións encamiñadas ao agrupamento de propietarios de parcelas no monte, e especialmente o impulso ás SOFOR (Sociedades de Fomento Forestal).
Axúntase de seguido cadro resumo do orzamento 2011 da Consellería do Medio Rural:
ORZAMENTOS CONSELLERÍA DO MEDIO RURAL (COMPARATIVA 2011/2010)
CAPÍTULO* | I | II | IV | VI | VII | TOTAL | VARIACIÓN | % |
---|---|---|---|---|---|---|---|---|
DOTACIÓN 2011 | 145.306 | 10.475 | 15.790 | 135.194 | 218.284 | 525.049 | -136.377 | -20,6% |
DOTACIÓN 2010 | 154.163 | 11.370 | 20.671 | 206.381 | 268.841 | 661.426 |
Datos en miles de euros.
*CAPÍTULOS: I (Gastos de persoal); II (Gastos correntes en bens e servizos);
IV (Transferencias correntes); VI (Investimentos reais); VII (Transferencias de capital)
< Anterior | Seguinte > |
---|