O Centro Gaiástech aborda os Horizontes Dixitais dos sectores cultural, deportivo e turístico nun encontro con expertos

• A xornada, que terá lugar o día 4 en horario de mañá na Sala Eisenman da Cidade da Cultura, analizará en tres mesas redondas os retos e aplicacións da tecnoloxía en cada ámbito
• O encontro completarase cun relatorio de Raúl Serapio, CEO de Neuromobile e un dos 100 directivos máis creativos segundo Forbes 
• Os interesados en participar só precisan inscribirse na web do GaiásTech

Santiago de Compostela, 30 de maio de 2024.- Baixo o titulo Horizontes Dixitais, o Centro GaiásTech organiza o vindeiro 4 de xuño, unha xornada sobre os retos e oportunidades da transformación dixital no sectores cultural, deportivo e turístico. O encontro, que terá lugar en horario de mañá na Sala Eisenman da Cidade da Cultura, está dirixido á cidadanía e empresas e os interesados en asistir só precisan inscribirse na portal do GaiasTech.

A xornada estrutúrase en tres mesas redondas, unha por sector, ademais dun relatorio e unha demostración de olería orixinal. O CEO de Neuromobile, Raúl Serapio, recoñecido como uns dos 100 directivos máis creativos pola revista Forbes en 2022, será o encargado da conferencia inicial. 

A primeira das mesas abordará a aplicación da tecnoloxía no sector cultural. Moderará a  responsable de Comunicación, Marketing e Sostibilidade de El Pulpo, María Canle; e intervirán Paola Guimerans  da Aula STEAM E-textiles: O Arte en STEM;  Ana Martínez, técnica do Museo Arqueolóxico e Histórico do Castelo de San Antón de A Coruña; e  Juan Carlos Fasero, director Xeral de Innovacion, Tecnoloxía e IA no Concello de Ourense.

O debate sobre a transformación dixital no sector turístico será moderado por Ruth González, xefa de servizo de Turismo da Deputación Pontevedra; e nel participarán Andrés Martinez, CEO de Iurban, unha empresa que ofrece chatbots conectados a 95 idiomas;  Esther Rodríguez Ramos de MyStreetBook, especializada no uso da Intelixencia Artificial para a creación de rutas especializadas; e José Troitiño de SH360, que proporciona servizos integrais de xestión hoteleira.

A mesa final centrarase na transformación dixital das empresas deportivas. Moderada por Julio César Bernárdez da Federación Galega de Baloncesto, contará coa participación de Carla da Silva, técnica de Innovación do Clúster Galego da Industria do Deporte e o Benestar; Tito Ramallo de ScoutYouPro, unha plataforma dixital para o seguimento e avaliación do rendemento dos deportistas; e de Miguel Álvarez de Kaantera, unha aplicación dixital de planificación e control da actividade deportiva para clubs e redes de academias.