A Xunta aproba o protocolo para a protección ás persoas empregadas públicas vítimas de violencia de xénero

• A iniciativa conta co voto favorable de todas as organización sindicais da mesa xeral, e será aplicada ás persoas empregadas públicas da Administración xeral da Xunta e as entidades públicas instrumentais do sector público autonómico
• Ademais de dar apoio ás vítimas e protexelas no ámbito laboral, o protocolo facilitará a estas traballadoras a súa continuidade laboral e informaraas das medidas acordadas no Plan de igualdade
• Recolle tamén os pasos a seguir polo servizo de persoal da consellería á que pertence a vítima no prazo máximo de 48 horas

 

A Xunta de Galicia aprobou hoxe, na reunión do Consello, o Protocolo da Administración autonómica para a protección ás persas empregas públicas vítimas de violencia de xénero. Unha iniciativa, que conta co voto favorable de todas as organizacións sindicais da mesa xeral, e que será aplicada ás persoas empregadas públicas da Administración xeral da Xunta e ás entidades públicas instrumentais do sector público autonómico: organismos autónomos, axencias públicas autonómicas, entidades públicas empresariais e consorcios autonómicos.

Ademais de dar apoio ás vítimas de violencia de xénero e protexelas no ámbito laboral, o protocolo facilitará tamén a estas traballadoras a continuidade laboral, ademais de informalas das medidas acordadas no Plan de igualdade, así como das dispostas na normativa legal vixente, facilitando aquelas que sexan adecuadas para o seu apoio.

Así mesmo, promoverá unha cultura de tolerancia cero na Administración xeral da Xunta e sensibilizará aos traballadores para conseguir a igualdade efectiva entre mulleres e homes, ademais de establecer o procedemento de comunicación e as garantías de confidencialidade, intimidade e dignidade da vítima.

O protocolo recolle os pasos a seguir ante a comunicación dunha situación de violencia de xénero. Así, o servizo de persoal da consellería á que pertence a vítima realizará unha serie de actuacións no prazo máximo de 48 horas: informará e asesorará á persoa afectada; entrevistarase con ela para informala das medidas laborais e sociais contempladas no Protocolo, así como dos dereitos para acollerse inmediatamente a estas; acompañaraa en todo o proceso e guiaraa na solicitude dos seus dereitos.

O documento reflicte ademais as medidas xa establecidas tanto na Lei 2/2015, do 29 de abril, do emprego público de Galicia, como no Decreto 151/2022, do 4 de agosto, polo que se aproba o Regulamento dos procedementos de mobilidade do persoal funcionario de carreira da Administración xeral da Comunidade Autónoma de Galicia e das entidades públicas instrumentais integrantes do sector público autonómico. Medias entre as que figuran: o traslado do posto de traballo, a posibilidade de redución da xornada de traballo, horario flexible por razón da conciliación da vida persoal e familiar ou a posibilidade de teletraballo. E sempre garantindo a confidencialidade da vítima.

Por último, este o protocolo contará cunha comisión de seguimento.