A Xunta aboará este mes o incremento salarial do 2% previsto no acordo salarial entre o goberno central e os sindicatos
- O Goberno galego aplica a suba na próxima nómina, despois de que o Goberno central se demorase seis meses en autorizalo
- Este incremento adicional aplicarase con efectos do 1 de xaneiro de 2024 e suporá unha suba media de 782 € no salario dos empregados públicos autonómicos e un custo de 97 M€
- Sumado ao 0,5% de incremento que se aplicou en febreiro, consolida un crecemento anual do 2,5% no 2024
Santiago de Compostela, 1 de xullo de 2024.- A Xunta aboará este mes de xullo aos empregados públicos autonómicos o incremento salarial do 2% das retribucións para compensar os efectos da inflación. A situación económica e social xerada polos conflitos de Ucraína e Oriente Próximo e a consecuente crise enerxética motivou un aumento do coste de vida polo impacto da inflación, o que provocou a posta en marcha de medidas para intentar paliar os efectos no poder adquisitivo dos empregados e empregadas públicos.
Esta medida estaba xa contemplada na disposición adicional oitava da Lei 9/2023, do 28 de decembro, de orzamentos xerais da Comunidade Autónoma de Galicia para o ano 2024, pero para a súa aplicación precisaba que o habilitara a normativa básica do Estado.
A Xunta aplica esta suba xa este mesmo mes, despois de que o Goberno central tardara medio ano en aprobar a norma que habilita este incremento, que establece a actualización das retribucións do persoal ao servizo do sector público.
Esta medida complementa a xa adoptada en febreiro deste mesmo ano, ao cumprirse a condición de crecemento do PIB prevista, o que supuxo un aumento do 0,5%, que determina que o incremento anual consolidado para os empregados públicos autonómicos sexa do 2,5% neste 2024.
Salarios e custes
Este incremento adicional aplicarase con efectos do 1 de xaneiro de 2024 e suporá unha suba media de 782 € no salario dos empregados públicos autonómicos e un custo de 97 M€, mentres que o incremento de febreiro supuxo de media 196 € máis na nómina dos empregados e un custo de 24 M€.
O 2,5% anual de incremento consolidado deste 2024 supón un custo para a Facenda pública de 121 M€ e un incremento salarial medio de preto de mil euros para os empregados públicos autonómicos.